Gujarat Monsoon Update:- ગુજરાતમાં છેલ્લા 24 કલાકમાં (તારીખ 28 જૂનની સવાર સુધીમાં) ગુજરાતના 126 જેટલા તાલુકાઓને વરસાદે ધમરોળી નાખ્યા છે. જેમા સૌથી વધુ 6 ઇંચ વરસાદ બારડોલીમાં ખાબક્યો છે. તો બીજી બાજુ સાયક્લોનિક સર્ક્યુલેશનના લીધે રાજ્યમાં હજુ ભારેથી અતિભારે વરસાદ પડે તેવી હવામાન વિભાગે આગાહી રજુ કરી છે.
હવામાન વિભાગ દ્વારા રજુ કરવામાં આવેલા આંકડાઓ અનુસાર, ગુજરાતમાં આજ સવારે 6.00 કલાક પહેલાના 24 કલાક દરમિયાન 126 તાલુકામાં વરસાદ પડ્યો હતો. જેમા સૌથી વધુ સુરતના બારડોલીમાં 6 ઈંચ વરસાદ પડ્યો હતો. સુરતના મહુવા અને તાપીના વાલોદમાં સાડા પાંચ ઈંચ જેટલો વરસાદ ખાબક્યો છે. નવસારીમાં સવા પાંચ ઈંચ વરસાદ પડ્યો છે.
આ ઉપરાંત વલસાડના પારડી, ખેરગામ, ચિખલી, ધરમપુર, સુરત, ડોલવાણ, મુંદ્રા, ધોધા, કામરેજ, વલ્લભીપુર, વાપી, કપરાડા, નેત્રંગ, ઉમરપાડા, સોનગઠમાં બે ઇંચથી વધુ વરસાદ નોંધાયો છે.
દક્ષિણ ગુજરાતમાં વરસાદનું આગમ થઈ ચુક્યું છે. ત્યારે ડાંગ જિલ્લામાં માત્ર 3 ઈંચ વરસાદને પગલે ઘાટ માર્ગ પર પથ્થર પડવાની ઘટના પણ સામે આવી છે. સાપુતારા ઘાટ માર્ગમાં પથ્થર પડવાથી માર્ગ મકાન વિભાગ હરકતમાં આવ્યું છે. સામાન્ય વરસાદમાં પથ્થરો પડવાની ઘટનાઓ બની રહી છે તો સવાલ એ છે કે, ભારે વરસાદ આવશે ત્યારે કેવી સ્થિતિનું નિર્માણ થશે તે સ્પષ્ટ દેખાઇ રહ્યું છે. મહત્વનું છે કે, ગત ચોમાસામાં ભેખડ ઘસી પડવાથી 6 મહિના સુધી માર્ગ બંધ રાખવાની ફરજ પડી હતી.
હવામાન વિભાગની આગાહી પ્રમાણે, દક્ષિણ ગુજરાતમાં ભારેથી અતિભારે વરસાદ પણ થઈ શકે છે. જેમકે વલસાડ, નવસારી, દમણ, દાદરા નગરહવેલીમાં ભારેથી અતિભારે વરસાદની શક્યતા છે. આ સાથે દક્ષિણ ગુજરાતમાં સુરત, ભરૂચ, ડાંગ, તાપીમાં ભારે વરસાદ પડી શકે છે. તેમણે વધુમાં જણાવ્યુ કે, સૌરાષ્ટ્ર-કચ્છમાં પણ આગામી 5 દિવસ વરસાદ રહેશે. સૌરાષ્ટ્રના ભાવનગર, અમરેલી, ગીર સોમનાથ, રાજકોટ, કચ્છ, પોરબંદર અને જૂનાગઢમાં ભારેથી અતિભારે વરસાદ થવાની આગાહી છે.
આવીજ અવનવી માહિતી દરરોજ વોટ્સએપમાં મેળવવા માટે નીચે આપેલ બટન પર ક્લિક કરો.
